ХӨШИГИЙН ХӨНДИЙ, БОГДХАН ТӨМӨР ЗАМЫН ЧИГЛЭЛИЙН ДАГУУ ХИЙГДЭХ БҮТЭЭН БАЙГУУЛАЛТЫН АСУУДЛААР ХЭЛЭЛЦЛЭЭ
Алсын хараа 2050, Монгол Улсын урт хугацааны хөгжлийн бодлогод тусгагдсан “Улаанбаатар хотын төвлөрлийг тэлэх зорилготой Хөшигийн хөндий, Шинэ зуунмод, Майдар хотуудын хөгжлийн төлөвлөлтийг боловсруулж, цогц агуулгаар шийдвэрлэхийг зорьж байгаа. Мөн Засгийн газраас Мандал өртөөнөөс Богдхан уулын урдуур тойрч Мааньт өртөөнд холбогдох чиглэлтэй 174.78 километр Богдхан төмөр замын төслийг хэрэгжүүлж ажиллаж байна. Богдхан төмөр зам нь Нийслэлийн Сонгинохайрхан, Хан-Уул дүүргийн нутаг дэвсгэр болон Хөшигийн хөндий, Төв аймгийн Сэргэлэн, Алтанбулаг сумын нутаг дэвсгэрийг дайрч өнгөрөх юм. Тиймээс Хөшигийн хөндий, Богдхан төмөр замын чиглэл дагуу хийгдэх дэд бүтэц, зам тээврийг дагасан бүтээн байгуулалтын ажлын явцын талаар уулзалт хэлэлцүүлгийг зохион байгуулж, санал солилцлоо.
Хурлаар Барилга, хот байгуулалтын сайд Б.Мөнхбаатар Хөшигийн хөндий, Богдхан төмөр замын бүтээн байгуулалтын асуудлаар Газар зохион байгуулалт, геодези зураг зүйн газрын орлогч дарга М.Буяндэлгэрээр ахлуулсан ажлын хэсэг байгуулах, уг ажлын хэсэг 14 хоногийн хугацаатай дээрх асуудлаар нарийвчилсан төлөвлөгөө гаргах, газар дээр нь хийгдэх тооцоо судалгаа, цаашид авч хэрэгжүүлэх арга хэмжээний талаар санал боловсруулах чиглэлийг үүрэг болголоо.
Уулзалт, хэлэлцүүлэгт Барилга, хот байгуулалтын яам, Газар зохион байгуулалт, геодези зураг зүйн газар, Барилгын хөгжлийн төв болон Нийслэлийн газрын алба, Төв аймгийн Газрын харилцаа, барилга хот байгуулалтын газрын холбогдох албаныхан оролцсон юм
