Барилгын материал, орон сууц, дэвшилтэт технологийн үзэсгэлэнд урьж байна

Байр, орон сууц, барилгын материалыг нэгэн дор төвлөрүүлдэг намрын хамгийн том үзэсгэлэн яармаг “БАРИЛГА ОРОН СУУЦ 2018” болох гэж байна. Монгол Улсад Орчин цагийн барилгын салбар үүсэн байгуулагдсаны 92 жилийн ой, Барилгачдын баярыг тохиолдуулан болж буй уг үзэсгэлэн 2018 оны 08 дугаар сарын 24-26-ны өдрүүдэд Мишээл экспо төвд зохион байгуулагдана. Үзэсгэлэнгийн ерөнхий зохион байгуулагчаар “Барилга.МН”, хамтран зохион байгуулагчаар Барилга, Хот Байгуулалтын Яам, Барилгын Хөгжлийн Төв, дэмжигч байгууллагаар Улаанбаатар хотын захирагчийн ажлын алба, Монголын барилгын үндэсний ассоциаци ажиллаж байна. Мөн “Ногоон ирээдүйг бүтээнэ” уриатай “NCD Group” ХХК-ийнхан Ерөнхий ивээн тэтгэгчээр хамтран ажиллаж байгаа юм. Агаарын бохирдол, утааны асуудлыг шийдвэрлэх хүндхэн ачааг нуруундаа үүрч байдаг барилгын салбарынхан, энэ чиглэлийн бүхий л төрлийн үйлчилгээ үзүүлэгч 120 гаруй компани иргэдэд бүтээгдэхүүн үйлчилгээгээ дэлгэн танилцуулдаг билээ. Үзэсгэлэнд ирснээр Улаанбаатар хотод хэрэгжиж буй шинэ орон сууцны төслүүд, барилгын материал, дэвшилтэт технологи, барилгын зураг төсөл, архитектур, ландшафт, амины орон сууц, тоног төхөөрөмж, гадна ба дотор тохижилт гээд барилгын салбарт холбогдолтой бүх чиглэлийн мэдээллийг нэг дороос авах боломжтой. Түүнчлэн үзэсгэлэнгийн оролцогчид, үзэгчдийн хүрээ жил ирэх тусам өргөжин тэлж гадаадын үйлдвэрлэгч нийлүүлэгчид манай барилгын материалын зах зээлийг ихээхэн сонирхон оролцох болсон билээ.

Байр авах гэж буй иргэддээ зориулан нийслэл хотод төсөл хэрэгжүүлж буй компаниуд онцгой хөнгөлөлт, урамшуулал болон төлбөрийн уян хатан нөхцөлтэйгөөр орон сууц авах бүхий боломжуудыг олгож байгаа ажээ. Харин байрны үнийн мэдээллээс дуулгахад зэрэглэлээс хамааран янз бүр байна. Тухайлбал стандарт орон сууцнуудын үнэ 1,150,000 төгрөгөөс дээш байгаа бол тансаг зэрэглэлийн буюу хамгийн өндөр үнэтэй нь 3,800,000 төгрөг орчим байна. Иргэд “Содон” стандарт цогцолбор хороолол, “Офицер таун”, “Сити апартмент & Сити Молл”, “Модун таун”, “High Apartment” төсөл, “VIP Residence” зэрэг 40 гаруй орон сууцны төслөөс үнэ ханшийг нь харьцуулан дүгнэж сонголтоо хийх боломжтой юм. Харин амины орон сууц барихаар төлөвлөсөн иргэд үзэсгэлэнгийн гадна талбайгаас энэ төрлийн үйлчилгээ үзүүлэгч компаниуд, мэргэжлийн хүмүүстэй уулзаж, хүссэн зөвлөгөө мэдээллээ аваарай.

Барилгын материал, дэвшилтэт технологи сонирхогчид гадаад, дотоодын 80 гаруй компанийн бүтээгдэхүүн, үйлчилгээтэй танилцаж болох нь ээ. Энд Орос, Хятад, Солонгос, Польш, Унгар, Чех, Герман, Итали болон Монголынхоо 80 гаруй ханган нийлүүлэгчдийн барилгын материал, тоног төхөөрөмж, үйлчилгээг нэг дороос авч болох аж. 39700647_722221138170099_6851257858357460992_n “Барилга Орон Сууц 2018” үзэсгэлэнгийн гурван өдрийн туршид нийт оролцогч, үзэгчид гээд хэн бүхэнд зориулсан сургалт, уулзалт, семинарууд тасралтгүй явагдах юм. Семинаруудад ШУТИС-ийн Эрчим хүчний хэмнэлтийн төвийн захирал Б.Мөнхбаяр “Агаарын бохирдлыг бууруулахад агаар-агаарын дулааны насосыг ашиглах нь”, Монголын барилгын үндэсний ассоциацийн Тусгай зөвшөөрлийн хэлтсийн дарга М.Энхбаатар Тусгай зөвшөөрлийн асуудал, Монголын ипотекийн корпорацийн ОНХХ-ийн захирал Х.Батхишиг орон сууцны ипотекийн зээлийн талаар тус бүр илтгэл тавьж оролцоно. Мөн энэ үеэр Герман, Орос, Японы шилдэг бүтээгдэхүүнүүдийг танилцуулах арга хэмжээнүүд тасралтгүй явагдах юм байна. Барилгын салбарын бүх төрлийн худалдааг төвлөрүүлж, зах зээлийг идэвхжүүлж, шинэ соргог мэдээллээр хангах уулзалт семинаруудаар дүүрэн “Барилга Орон Сууц 2018” үзэсгэлэн яармагт хүрэлцэн ирэхийг урьж байна.