“БАРИЛГЫН САЛБАРЫН УДИРДАХ АЖИЛТНЫ ЗӨВЛӨГӨӨН-2024” БОЛЛОО
Монгол Улсад Барилгын салбар үүсч хөгжсөний түүхт 98 жилийн ойн хүрээнд “Барилгын салбарын удирдах ажилтны зөвлөгөөн-2024” салбарын нэгдсэн арга хэмжээ Орхон аймгийн Уурхайчин соёлын төвд өнөөдөр /2024.04.05/ болж байна.
Зөвлөгөөнд Төрийн болон төрийн бус байгууллагууд, 21 аймгийн Газрын харилцаа, барилга, хот байгуулалтын газрын мэргэжилтнүүд, барилгачид, инженер, техникийн ажилтнууд, барилгын салбарт үйл ажиллагаа эрхэлж буй аж ахуй нэгжүүдийн төлөөлөл болох нийт 400 гаруй хүн оролцож байна.
Барилгын салбар тулгамдаж буй асуудлуудаа шийдвэрлэх, хууль, эрх зүйн баримт бичгүүдээ шинэчилж, хяналт, хариуцлагын тогтолцоог сайжруулах, цаашид авч хэрэгжүүлэх бодлого, үйл ажиллагаагаа дээшлүүлж, үр өгөөжийг нь нэмэгдүүлэх зорилтын дор энэхүү нэгдсэн зөвлөгөөнийг зохион байгуулж байна.
Барилга, хот байгуулалтын сайд Цэрэнпилийн Даваасүрэн зөвлөгөөнийг нээж, үг хэллээ. Тэрбээр:
Барилгын салбарт 5418 аж ахуйн нэгж, байгууллага үйл ажиллагаа эрхэлж, 110 мянга гаруй хүн ажиллаж байгааг цохон тэмдэглээд Монгол Улсын Барилга, хот байгуулалтын салбарт бүтээн байгуулалтын ажил тасралтгүй өрнөж 2023 оны эцсийн байдлаар 79.1 мянган ажилтан, албан хаагчидтайгаар 7.5 их наяд төгрөгийн барилга угсралт, их засварын ажлыг гүйцэтгэж, 19 мянган айлын орон сууцны барилгыг ашиглалтад оруулан, шинэ хотуудын төлөвлөлтийг хийж, инженерийн дэд бүтцийн эх үүсвэр, шугам сүлжээний хүчин чадлыг нэмэгдүүлэн, газрын харилцааг цахимжуулж, Улсынхаа хөгжил цэцэглэлтэд үлэмж их үүрэг гүйцэтгэн ажилласаныг онцлов.
Тухайлбал: Нийслэл хотын хэт төвлөрлийг бууруулах, дагуул хотыг хөгжүүлэх хүрээнд “Шинэ Зуунмод” хотын Ерөнхий төлөвлөгөөг боловсруулж эхний ээлжийн инженерийн дэд бүтцийн ажлыг гүйцэтгэн, Улаанбаатар хотын авто зам, тээврийн сүлжээний нэвтрүүлэх чадварыг нэмэгдүүлэх, голын дагуу үерийн гамшигаас хамгаалах арга хэмжээг сайжруулах “Сэлбэ сэргэлт” төсөл, “Инженерийн бэлтгэл арга хэмжээний мастер төлөвлөгөөг тус тус боловсруулж дуусган санхүүжилтийн асуудлыг шийдвэрлэн ажиллаж байгаа гэлээ. Мөн орон сууцны хангамжийг нэмэгдүүлэх бодлогын хүрээнд “Ногоон нуур-1008 айлын орон сууц”-ны хороолол барих төслийг хэрэгжүүлж, барилга угсралтын ажлыг эхлүүлэн, Барилгын материалын чанарт тавих хяналтыг сайжруулах зорилгоор Дорноговь аймгийн Замын-Үүд сумын хилийн боомтод “Барилгын материалын сорилт шинжилгээний түргэвчилсэн лаборатори”-ийг ашиглалтад оруулсан зэрэг бүтээн байгуулалтын чиглэлээр хэрэгжүүлж буй томоохон төсөл, арга хэмжээний мэдээллийг танилцууллаа.
Бодлогын шинэчлэлийн хүрээнд Бүтээн байгуулалтын төсөл, хөтөлбөрийн хэрэгцээ шаардлагатай уялдуулан салбарын хөгжлийг эрчимжүүлэх зорилгоор Барилгын хуулийн шинэчилсэн найруулгын төсөл, Хот байгуулалтын тухай, Геодези, зураг зүйн тухай хуулийн шинэчилсэн найруулгын төслийг УИХ-д өргөн мэдүүлж батлуулахаар ажиллаж байна. Тодруулбал салбарын хэмжээнд зөвшөөрөлгүй барилгын ажил эхлүүлэх явдал хавтгайрсан байна. Гэтэл хариуцлага нь зөвшөөрлийн хуулийн дагуу хэдхэн сая төгрөгөөр торгохоор заасан.Энэ мэт эрх зүйн сул зохицуулалтаас болж хуулийн зөрчил газар авч байна. Үүгээр ч зогсохгүй иргэдээс захиалга авч ихээхэн хэмжээний хөрөнгө татчихаад барилгаа ашиглалтад өгөхгүй иргэдийг хуурч хохироох асуудал гарч тул хариуцлагын зохицуулалтыг сайжруулах чиглэлээр Барилгын хуулийн шинэчилсэн найруулгыг боловсруулж, Засгийн газар, Улсын Их Хуралд өргөн барихаар ажиллаж байна гэв. Мөн Барилгын салбарын норм, нормативын баримт бичгийг олон улсын жишигт хүргэх үүднээс норм, нормативын үндэсний хүрээлэн байгуулах саналыг Засгийн газарт оруулахаар ажиллаж байгаагаа салбарын сайд тэмдэглэв.
Барилгын салбар өндөр ашиг олох, мөнгө угаахад чиглэх бус иргэдийн аюулгүй амьдарч, ажиллаж хөдөлмөрлөх орчныг бүтээн байгуулахад чиглэх ёстой. Манай салбар цаг үеийн шаарлагад нийцсэн төлөвлөлт хийж, шинэ дэвшилтэт технологиудыг нэвтрүүлж, ухаалаг ногоон, орчинг бүрдүүлэх шинэ зорилтууд тулгараад байна. Энэхүү зорилтуудыг хэрэгжүүлэхийн төлөө оюун ухаан, хүч хөдөлмөр, сэтгэл зүрхээрээ нэгдэн зүтгэхийг хүсч, зөвлөгөөний үйл ажиллагаанд амжилт хүслээ.
“Аюулгүй барилга, аюулгүй орчин, аюулгүй ажиллагаа” уриан дор зохион байгуулж буй тус звлөгөөнөөр “Барилга, хот байгуулалтын салбарт баримталж буй бодлого-бүсчилсэн хөгжил”, “Төсвийн хөрөнгө оруулалтын үр ашиг, цахим шинэчлэл”, “Барилгын ерөнхий хуулийн шинэчилсэн найруулгын төсөл”, “Барилга байгууламжийн галын аюулгүй байдлын техникийн зохицуулалт”, “Барила байгууламжийн аюулгүй байдлын техникийн зохицуулалт”, “Орхон аймгийн бүтээн байгуулалт, аюулгүй орчин, цаашдын чиг хандлага”, “Аюулгүй барилга, аюулгүй орчин”, “Олон Улсын Фидик-ийн жишиг гэрээний онцлог” зэрэг сэдвээр илтгэл тавьж, хэлэлцүүлэг өрнүүллээ.
Зөвлөгөөний төгсгөлд гарсан саналуудыг нэгтгэн багцалж, цаашид авч хэрэгжүүлэх бодлогын шинэчлэл, үйл ажииллагааны чиглэлээр зөвлөмж боловсруулж батлууллаа.
