“Барилга, байгууламжийн зураг төслийн чанар, үр өгөөж, хяналтыг сайжруулах нь” сэдэвт хэлэлцүүлэг боллоо

Барилга, хот байгуулалтын яам, Барилгын хөгжлийн төвөөс "Барилга, байгууламжийн чанар, үр өгөөж, хяналтыг сайжруулах нь” сэдвээр хэлэлцүүлэг зохион байгууллаа. Хэлэлцүүлэгт, Барилга, хот байгуулалтын сайд Б.Мөнхбаатар болон холбогдох газар, хэлтэс, харьяа байгууллагын удирдлагууд, Онцгой байдлын ерөнхий газар, Мэргэжлийн хяналтын ерөнхий газар, нийслэлийн Засаг даргын Тамгын газрын Хөрөнгө оруулалт, хөгжлийн бодлого төлөвлөлтийн хэлтэс, аймгийн Газрын харилцаа, хот байгуулалтын газрын холбогдох албан тушаалтнууд оролцлоо. Хэлэлцүүлгээр барилга байгууламжийн зураг төслийн төлөвлөлт, гүйцэтгэл, цаашид анхаарах асуудал болон "Хүн амын нутагшилт, суурьшлын хөгжлийн ерөнхий төлөвлөгөө"- /ХАНСХЕТ/ ба улсын төсвийн хөрөнгө оруулалтын хоорондын уялдаа гэх зэрэг сэдвүүдээр илтгэл хэлэлцүүлэг тавьж, санал солилцсон юм. Тодруулбал, Барилгын салбарт Монгол Улсын Засгийн газраас баримталж буй бодлого, чиглэл болон улсын хэмжээнд 2020-2021 онд хэрэгжүүлсэн зураг төсөл, техник эдийн засгийн үндэслэлийн төлөвлөлт, хэрэгжилт, гарч буй хүндрэл болон цаашид анхаарах асуудлын талаар санал солилцож, ярилцлаа.

Барилга, байгууламжийн хөрөнгө оруулалт, төсөл, арга хэмжээний ТЭЗҮ, зураг төслийг Барилга, хот байгуулалтын яаманд төвлөрүүлэн мэргэжлийн түвшинд нэгдсэн бодлогоор хангаж, хэрэгжилтийг дүгнэн ажиллахыг Монгол Улсын Засгийн газраас үүрэг болгосон. Үүний дагуу улсын хэмжээнд хэрэглэгдэх нэг маягийн болон нэн шаардлагатай зураг төсвийн нэгдсэн мэдээллийн санг бий болгох бодлого, зорилтын хүрээнд Барилга, хот байгуулалтын сайдын багцад ТЭЗҮ, зураг төсвийн багц хөрөнгө батлагдсанаар салбарын яамд, агентлаг, орон нутгаас ирүүлсэн саналыг ач холбогдлоор нь эрэмбэлэн нэн тэргүүнд шаардлагатай төсөл, арга хэмжээний жагсаалтыг батлан хэрэгжүүлэх ажлыг 2020 оноос эхлэн үе шаттайгаар хэрэгжүүлэн ажиллаж байна.