Барилга, хот байгуулалтын яам “Төрийн албан хаагч эмэгтэйчүүдийн манлайллын хөтөлбөр"-ийг анхлан хэрэгжүүлж байна
"Монгол улсад мэргэжлийн иргэн төвтэй төрийн албыг төлөвшүүлэх нь" төслийн хүрээнд "Либерал эмэгтэйчүүдийн оюуны сангаас хэрэгжүүлж буй "Төрийн албан хаагч эмэгтэйчүүдийн манлайлал" сургалт Барилгын хөгжлийн төвд зохион байгуулагдаж байна. Төрийн албанд жендэрийн тэгш байдлыг хангах, удирдах албан тушаалд ажиллаж байгаа эмэгтэйчүүдийн карьер хөгжлийг дэмжих хөтөлбөрийг Барилга, хот байгуулалтын яам анхлан хэрэгжүүлж байна. Сургалтыг Барилга, хот байгуулалтын яамны Төрийн захиргааны удирдлагын газрын дарга Д.Баярсайхан нээж, үг хэлэн оролцогчид болон зохион байгуулагч талд сургалтын өндөр амжилт хүслээ.
2021-2022 оны ээлжит хөтөлбөрт Монгол Улсын Засгийн газрын яам, агентлагууд болон аймаг, нийслэлийн төр захиргааны байгууллагын удирдах албан тушаалд ажиллаж буй 60, Барилга хот байгуулалтын яамнаас 10, нийт 70 эмэгтэй сонгогдон оролцож байна. Сургалт "Менторшип хөтөлбөр", "Манлайллын сургалт", Коучийн сургалт гэсэн хэсэгтэйгээр гурван сарын турш цахимаар явагдана. Энэхүү сургалтын гол зорилго шийдвэр гаргах түвшинд эмэгтэйчүүдийн оролцоог нэмэгдүүлэхэд чиглэж байгаа юм.
