Монгол Улс Ногоон барилгын аудитортой боллоо
Хот байгуулалт, барилга, орон сууцжуулалтын яам, “Ногоон барилгын хүрээлэн” ТББ, “Барилгын хөгжлийн төв” ТӨААТҮГ хамтран ногоон барилгын аудитор бэлтгэх сургалтыг 2025 оны 05 дугаар сарын 19-ний өдрөөс эхлэн 05 дугаар сарын 27-ны өдрийн хооронд зохион байгуулсан бөгөөд сургалтад нийт 53 инженер техникийн ажилчид хамрагдаж 2025 оны 06 дугаар сарын 27-ны өдөр “BestGER” Ногоон барилгын Хялбаршуулсан төрөлд аудитор хийх шаардагыг хангаж шалгалтад тэнцсэн 11 аудиторт гэрчилгээ гардууллаа.
ХББОС-ын сайдын 2024 оны 12 дугаар сарын 02-ны өдрийн 108 дугаар тушаалаар “Ногоон барилгын үнэлгээ (Bestger)-ний аргачлал”
2024 оны 12 дугаар сарын 27-ны өдрийн 153 дугаар тушаалаар “Ногоон барилгын (Bestger) гэрчилгээ олгох журам”, 2025 оны 05 дугаар сарын 16-ны өдрийн 114 дүгээр тушаалаар “Ногоон барилгын аудитор, сургагч багш бэлтгэх журам” тус тус баталж ногоон барилгын эрх зүйн асуудлыг зохицуулах баримт бичгүүдийг гаргасан.
“BestGER” Ногоон барилгын Хялбаршуулсан төрөлд үнэлгээ хийх аудитортой болсноор иргэд эрчим хүчний хэмнэлттэй, дулаан алдагдалгүй, тав тухтай, ашиглалтын зардал багатай амины орон сууц барих, ногоон зээлд хамрагдах боломж бүрдэх болон гэр хорооллын яндангийн тоо буурч хүлэмжийн хийн ялгарлыг багасгахад тодорхой хувь нэмэр үзүүлэх боломж бий болоод байна.
